عينيك ليهن
في حياتي كرج
وببزملك عميري الباقي
ريدا في الحنايا يعج
بوقدلك حروف شعري
نورا في الضلام بيفج
فلاتنسي الوعود يا حره
واشواقا جوايا تضج
حروفك منبع الافراح
وكت يبكي القليب ينخج
وكت يقسي الزمان ويجور
يهاتيلك من عميق الفج
يشيل اقدارو والحرمان
يشابيلك ورود الحج
حروف اسمك حياة انسان
يزاورك واللسان يلهج
يدافس في زحام الحب
عزيمتو تصارعو ويهرج
ورجفة ورده في الابدان
سنونو يعضعضا وتكرج
يباس ريقو وصنين اذان
وحزنا في قفاهو يصج
في الجوف الورم ورمان
عيونو تفارق البهرج
يغبي وبي شذاك يفيق
موهدب لا بموت لا بفج
بقيف وسط الحياة ميت
يموت وسط المواتى يرج
يفارق في زمان موصول
يواصل في زمان الهج
ايا بخت البخت لا متين
نعيش الواقع المحرج
ملازمنا الحزن من وين
يزورنا الواقع المبهج
وكل ما نضوي شمعايتين
يفاجئنا العجاجو يعج
شايل ريدنا تقروقتين
مفلخ وابتسامنا سرج
وكل ما يلقي فينا حنين
مطرقو في حنينا سلج
هو ماعارف غناوي الريد
وصدقا فيها ما بيلج
هو ماعارف مشاعرنا
بتلاويهو وخطاهو تلج
وكان قايل بيقدرلينا
زعلا بينا مابيلج
فلاتنسي الوعود يا حره
واشواقا جوايا تضج
ليست هناك تعليقات:
إرسال تعليق