أنقـــــى ســــلام

قسم ما بتشبهك وعكات
ولا الزيك تصيبو آلام

إذا المتلك صبح مورود
يكون حكم الزمن ظلام

بقسم بي هواك جواي
وفيك ما بحنث الأقسام

بخافلك من ندواة الورد
بخافلك من هوا النسام

بخافلك لا يصيبك برد
كيف عاد ان بقت اسقام؟

بخافلك خوف يجافي العد
ولا بتكتب حروفو اقلام

خوف في جذرو أعنف مد
ولا بوصف مداه كلام

دخل بين الخلايا امتد
سرت رعشاتو في العضام

أزرك ياملاك ينشد
وهاك من قلبي انقي سلام

لأنك انتي انبل فرد
وفيك آمنت بالإسلام

وعن عشقك محال إرتد
وجودك للقلب صمام

صوت عشقك بقالي النبض
وبتنفس هواك انسام

إذا عندك خذلني السرد
وقبلك كنت زول نضام

لأنو حروفي مابتنعد
وبوحي معاك ماهو كلام

إحساسات ولف ممتد
طواف كعبه ولباس إحرام

سلامات ياملاك دون عد
عمرك ربي سالم وتام