قدلة فرح

وحيده في وسط الزحام
مسافره من وجعا قديم
رقيقه ما بتعرف خصام
الا الزمن جاحد لئيم
فريده من جنس الغرام
حيرني انا الصوت الرخيم
مخنوقة بي عبرة وجع
صبورة ذي وجه الاديم
رفيعه ما بتطولها إيد
قريبه من صدر الحكيم
مياسة في قدلة فرح
حديثها زي همس النسيم
حساسه ما بتجرح شعور
ما بتزرع الحزن الأليم
بتداوي في الخاطر جراح
تتناسا إحساسها الكليم
تتماشي في كل الظروف
تتهادى بي خطوا هميم
إتحيرت فيها الحروف
في عيونها جنات النعيم
ما بوصفها العقل الحصيف
ما بعرفها الطبع الزميم
في عيونا اعياني الجدل
إنسانة سبحان الرحيم