الكتمان

صوتك يا مريوده سمعتو
زي الصور يوم نفخو بنحيا

نفضت اكفاني وقلبا شلتو
وجيت غرقان ياروح في السيا

شلت الحب في اعماقي جمعتو
جيت باللهفه و وعد اللقيا

جيت عشمان في الرحمه وانتو
جنة ريد وانهار السقيا

كنت هواك والريد ما خنتو
بس ضليت وضلالي مهيا

مرو سنين واشواقي يغمتو
كم حنيت واتمنيت في قلبي الكيا

التلفون يوم جاتني نغمتو
ينتح قلبي واقول احيييا

الكلمات في جوفي يصمتو
صوتي شحيح ولساني الطيا

يا معشوق في صدري كتمتو
الكتمان دي جهنم حيا

وطن مكلوم

يا ابويا كيف الراي؟

وقلب الوطن مكلوم

نقعد ننظر ساي؟

وراس الوطن مأزوم

الليله كتلو جناي

ياهو القدر محتوم

الليله شلو اعضاي

من عيني طار النوم

سلبوني روحي ضناي

صوت الحق المكتوم

حس الهتاف غنٌَاي

سيد الرصاص مهجوم

شافو القرش رضٌَاي

شفت القصاص محتوم

نكرو الشقي الحكاي

قال الحجر مردوم

كبش الكلام اللٌَاي

قال البيان ملخوم

سو بالكضب والله

حبل الكضب معدوم

كتلو الوليد.. والراي

فكره بتدوم وتدوم

لو كانوا هم حماي

يحمو الوطن من شوم

ما بحٌَ صوت الناي

ما كان بلد مشروم

ما سفكو يمه دماي

ما عفٌَنو  اب قدوم

صوت الابيض جاي

يا المجلس المشؤوم

جاييك كفني معاي

كتر سلاح الشوم

نبض الهتاف رضٌَاي

خلٌَى الكذوب مبلوم

سلاحي صوت غنٌَاي

صوت الشقي المظلوم

اليوم وكت ودٌَاي

ما اظن نخاف العوم

اكتلني يا ابضاي

بكره القيامه تقوم

نعرف منو السوٌَاي

ما للحصانه لزوم

دايرين وطن حنٌَاي

حلفا وجوبا وخرطوم

يرجع يغني معاي

الهامش المحروم

غربي وشرقنا مناي

شمال جنوبنا نقوم

سودان سمح عطٌَاي

سودان سلامو يدوم

٢٩/٧/٢٠١٩م

محي الدين ودالعقده ( مدينق)

خـــاطره 3

سبحان الكريم
كيف ها العيون جذابه
جارحات السهام
في قلبي صب عذابه
نتوهدب نطوف
في ريدا نبقي صحابه
تب ياصحبي شوف
كاسيه البنيه مهابه
من عينيها صاب
نهرالوداد والريده
ضل رماشا كاب
سبحانه كيفو وريدا
ياقلبي تاريك شاب
مادام كتبتو قصيده
مكتوب العذاب
ما بتمسحو التنهيده
ماشافتني يوم
وقع الجهاز من إيدي
ولا حستني يوم
إحساسا هد وريدي
سايقاها الغيوم
دخلت هواي وقصيدي
ياكلمات غناي
في ريدا أحكي وعيدي
بنود المود
و ننكسر لي ودادا
وإن طال السفر
أشواقنا ليها زواده
وإن طال السهر
ذكراها لينا وساده
عينيها الخطر
الما بتصدو عباده

حـــــــلم

مبسوط ياصديق
لمن فقدت صوابي
جافاني الكري
تلفت بواقي أعصابي
كم طف في الوري
وسألت عن أحبابي
تاريهم ورا
وريدم أظنه شرابي
ساجد في الثري
أحسب بواقي شبابي
والريد إعتري
قلبآ عليها يشابي
دي البت مزهرا
عينيها نهرآ صابي
لحظة أذكرا
باللهفة أركع حابي
بلسم سكرا
مسخ علي أعنابي
بنتآ مسكرا
قطعت علي أسبابي
شوف ياخ منكرا
في الجنة ليه روابي
متمني أنظرا
تبسم ولو بالنابي
ريدي يتاورا
تدخل ملاز أحبابي
ياريت ياتري
هل حلمي زيف وصبابي؟
أم يومآ نري
وحياتنا حبا رابي؟

خاطره 2

هزي إليك ببعض حنيني
تساقط حبآ غضآ رطبآ
مدي إلي ببعض سنيني
أمد إليك فؤادآ رحبآ
ينبض ودآ فاق أنيني
يعزف لحنآ يقطر حبآ
يحمل وشمآ فوق جبيني
مودة روحآ عشقآ عذبآ

الصبر

بشيل صبرك علي صبري
وصبر صبرك بقالي عذاب
عذابي معاك أروع من نعيم غيرك
نعيم غيرك عذابي أنا
وبزيدني عذاب
بشق الشوق وشوقك لي
شقا شوقي وكت اللقيا تبقي رهاب
وأصبر قلبي بصبرك علي صبرو
وكت صبر الصبر ينفد ويسقيني الزعاف إشراب
وريد الريد وكت يرتد قصير عمرو
أريد ريدك وريد ريدك وأطرز من هواك كتاب
وأعيش عيشة العشم لقياك
وعشمي أعيش معاك في عش
نعشعش فيه نفتح للأمل أبواب
يضم قلبي الحزين صدرك
بضمة حن
وحنك ياحنان حني
مدرس في حنان الجنة
كمين باب،، محي

خاطره 1

أزرف الدم مادموعي
وإرتكز محراب خشوعي
وأتأمل من يسد رمقي وجوعي
غير هذي الآدمية
إنها أسرت يراعي
رممت بعض طباعي
يممت نحوي شراعي
مثل غزو القادسية
إنها مثل تعالي
وتواضع نحو أنسي وتوالي
لا أري فيها جدالي
فهي أم النرجسية

دكتور المحن

دكتور المحن
قال العلاج في سبعه
وإن مادرعلاج
تشفي وتطيب في سبعه
في راسو الغليد
دايرلو قسمآ كبعه
مادل التهاب
في راسي خلف طبعه

شكيت الطبيب
قلت الطبيبه أحن
تديني العلاج
لا تتواني لا تستن
لكن واشقاي
ظنت وبئس الظن
قالت ياصديق
قسمآ صديقك جن

دكتور السجم
خلاك تضحكي فوقي
قايلاني إتوهم
سقمآ دفرفي عروقي
ده المرض إتلخم
لمن صبح في روقي
مايصيبك ندم
لكن طبيبكم سوقي

الطب ياودود
صبحت حكايتو صعيبه
في هذا الوجود
في دنيا حالكه رهيبه
الطب ماوعود
لكن تفاني وطيبه
في طبعو الخلود
وإن شاالله إنتي طبيبه
يحميك الودود
وقط ماتصيبك خيبه،،

شكوى

خليتك للرفع السما
وأرزاقنا عدلآ قسما
يديني من إخلاصي نور
تفضل حياتك مظلما
يديني قلبآ بالصدق
فيه الحقيقه مجسما
يديكي من علقم كذب
خدعه وخطاوي معسما
يديني من عرشو الكريم
روحآ أبيه وطاعما
يديكي من إبليس عبر
تعسف رويحتك ظالما
البظلم الناس بنظلم
والبقسي وين يلقي الحلم
وأنا إنظلمت وإرتضيت
قلت الجرح يوم بلتئم
لكن غرورك وخيبتك
لابد تخبو وتنزغم
شكيت للفطر السما
ملك الملوك صاحب العلم
أغروك بالجور والخداع
أغروك عراة العز والهدم
الببني بالكذبه الحياة
لابد حياتو بتنهدم
والببرا لحظات الريا
أعمالو تفضحو ينهزم
والبمشي في خطوة هواه
ماببقي زولآ ملتزم
ياخالقي لو صابني الكذب
بسوء عذابك إنتقم
أمنحني خطوات الصواب
والظن بصيب قلبآ سقم
من خدعة الناس العزاز
الكنت ظنآ منسجم
أنصفني أقطع دابرن
وأفضح أكاذيبن وإنتقم

جرحك غار

جرحك غار
وعاودني الألم تاوار
وتاهو خطاي من عثره
في لجة أسف ودار
وإتحطم قليبي حزين
وإتعقبت عليه أقدار
ضنك إنتي بشوفتك
وماشي علي فراقآ حار
وكم صبرتو بصبرك
وإزداد اللهيب آوار
بسوق لهفة خطاي عليك
وأجيك من زحمة المشوار
أجيك والحيره في عيني
بتطمس بهجة الأنوار
أشيل شوق العمر كلو
مضمخ بشذي النوار
ومن جوف الغناوي بشيل
حروفك روعة الأشعار
أقلب ليك شقاي نغم
شرايين قلبي تبقي أوتار
ومن أعمق عميق قلبي
بنفخ ريدي في المزمار
أغني ليك أحلي غناي
وأمدح فيك أغلي مناي
وأكتب بحروف إسمك
وأنحت في حشاك تذكار
وفي الميلاد أعيد ذكراك
أحاجي بيك نجوم الليل
وأهدهد نجمة الأسحار
أوصف للقمر صورتك
يموت كمدآ من الغيره
ويهيم بين جنتك والنار
لابتنفع عندك الصلوات
ولا فيض من دموعي غزار
ومهما تفيض وأزهق روحي
عند قدميك بحس بنفسي لسه بعيد وبينا فراغ وألف جدار
أجيلك عشان بحبك جد
لابرضي البعد عنك
ولابخفي الشعور منك
لكن الزمن دوار
كتير مرات بنتلاقي
وأكتر بالفراق نبعد
بنقرب بمشاعرنا
ونبعد في رؤي الأفكار
ولو ضنيتي بصورتك
بشيلك في حنا الخاطر
وأحميك من لظي الأقدار
أظل خايف عليك ياروح
وأدسك في قليب مجروح
متيم في الأسي ومحتار
ده أنا بخافلك من عيون الناس
بخافلك من زمن غدار

عشق العتمة

سابتني وقصدها تنقذني
من فرحي وعشقي واشواقي
شكت في صدقي وطردتني
والبينا سراب وأصبح لاغي
حسيت بالخيبة النهشتني
أدتني سمومها لترياقي
لابد لقت أحسن مني
والبحيا حيعرف ويلاقي
أشكال وألوان من خلق الله
وأنا قيمتي ومكسبي أخلاقي
سابتني ودخلت في عتمه
في كهف العشق المتشاقي
وحياتها حتصبح ذي كتمه
وتتمني تعود من عشاقي
وأنا
أنا ما بقبل أرجع تاني
لجحر لدغني
وجهجهني
أنا مؤمن وراضي بمكتوبي
قرآن الخالق وجهني
ودستورك طبعا يا وافية!
دستور الخدعة الدهدهني
أخرني أحصل أيامي
الفيها مشاعرك تنجهني
لكين أقداري وراضيها
من دون خلق الله بتندهني
سابتني وقصدها أتعذب
لكني سعيد هي الخانتني
سابتني وقصدها اتوهدب
لكني أكيد ما صانتني
ومبسوط أنساها وتنساني
تنفك عوارضا صابتني
وما بندم يوم اني لقيتك
وعينيك سهامك صادتني
وأخلصت وشلتك في راسي
صدعت ويا ما لاقتني
أحزان ومصائب تتواتر
في جوف اخلاصك باغتني
وكلت الخالق ينصفني
يغفر لك ذنب العادتني
ويعوض صبري الما قل
ترجع لي سنيني الرادتني

من حبي محي الدين ودالعقدة

من حبي أغني وأفرح
من حظي غناي يروح
كم مرة أزيل آلامك
تمليني هموم وجروح

من حبي أشيلك همسة
أصبحبك انتي وامسى
وأديك حواسي الخمسة
تمليني مصائب ونوح

من حبي وهبتك روحي
تغديبها صباح وتروحي
وتطوف حولك أبدآ....
من حظي نكأتي جروحي 

الحب ما شبهك انتي
ولا انتي بتشبهي حبي
ولا قلبك كان بستاهل
العشق الساكن قلبي
يامنبع كل مصيبة
لاقتني وسدت دربي

السما والأرض

عمر السماء ماكان جحود
و طالب أرضنا تمطرو
كل يوم يزيدها بروق وضي
نجماتو قط ما أتأخرو
كم هدأ من روع البلود
جنباتا أينعو خدرو
وكم داوي في الأرض الشقوق
عوراتها بيه إنسترو
طول عمرو ليها سبل غطا
وغطاه قط ما مترو
بدورو بتضوي الضلام
ونجومو للجن يزجرو
في كل ناحية دفر سحاب
خيراتو ما أظن يندرو
عارفين ده ليه؟
الأرض أنثي علي الدوام
لسماك دوام يتنكرو
خيراتو ليها بلا حساب
قط ما بهم يتذكرو
سب في النساء إن في الخراب
رجلينا يوت إتوكرو
شيلو السماء وباقي السحاب
إن ما عجبهن منظرو
وإت يا سمانا فضلت شاب
وفيك قط ما أتفكرو

بجاملك

بجاملك يامني عمري
وأشيلك في عيوني رمش
أغزل ليك ودادي وشاح
تخمشي من حناني خمش
وأريدك لا حساب لا عد
وأهديك عمري كله وأمش...
وأناديك ياصبابة الروح
تعالي قريب دموعي جرن
وأشيلك في فؤاد مجروح
جرحي سحيق وليه زمن
أهمس لك شعوري أبوح
كان فيك الجراح يبرن...
وأمشيك لا مساحة بين
ولا منك خطاي بتضل
وأرحل ليك سنين وسنين
لو حتي المسافة تشل
ولا في الريده ببقي ضنين
ولا أشواقي ليك بتقل...

وآأســـــــــــــــــــــــــفاي

يا مقذوفة في جوف الكلمة
يا معزوفة بنغم الناي
يا مرشوفة بدن الريدة
يا ملفوفة بطيب دنياي
يا مهتوفة بصوت البلبل
يا ملهوفة تشوفي وفاي
يا معروفة بطيب العشرة
يامصروفة لقلبي شقاي
يا مخسوفة بأرض الرحمة
يا مرصوفة بدربي أساي
كان مكتوب في لوح الواقع
تبدي مسيرتي وأمشي براي
وكان معروف في الامر الواقع
انه تحب عينيك سواي
وكنت مأمل قبل أشوفك
ألقي رويحتي أنا فيك ومناي
وكان متوقع منك كلمة
تمحو مصيبتي وكل عناي
الا زماني وطبعه الجائر
حطم قلبي وهد قواي
ذاد الظمأ الكان متغلغل
جوه ضلوعي وعمق حشاي
حتي الالم الكان أدمنتو
سافر طيفو وسابني براي
وحتي ملامحك شاخت فيا
واتوكيتها عصي مأساي
حتي دريبا كان ارتدتو
بقت تتعثر فيه خطاي
وحتي شتول الريدة البينا
من عيدانها بريتو عصاي
قمرك خاسف وكسفت شمسك
وخفت النجم الكان ضواي
بفتش عن ملامحك جيت
ملبدة بغيومها سماي
لقيتك وكان حلم عابر
سراب خلفو القليب جراي
كتبت عشان لقاك كتير
مدحتك بلسان نماي
رفعتك في الثريا مكان
رشحتك في مسام مغناي
لقيت الريدة كانت زيف
برد حضنا زمان دفاي
لقيت الرحمة شحت فيك
وكل الطيبة وآأسفااااااااااااي

نهـــــرين من أســـــي

أنا وإنتي نهرين من أسي
ينصب علي قلب الأسف
نتلاقي في حجر القسي
نتواتي في العشق النزف
أوصف صفاك يمكن عسي
أنحت وفاك خجل الصدف
يستحيا منك هم رسي
يتشابي ليك عقل إنختف
مزهر ضفافك نرجسا
لون الأصيل منك ختف
شيليني عكسك إنبهار
نتلاقي في ضو النهار
أحلامنا نحيا نهندسا
تعرف حياتنا الإزدهار
لوميني لي نجوم المسا
لو لحظة باقتك إنحدار
ما الريده أنبل مدرسه
تعلم ضفافنا الإنكسار
شلال دموع ما بنكسا
لا الدلتا تعني الإنشطار
ضميني لو موجك نسي
كيفن بكون الإنهمار
ختيني في العمق السحيق
تلقيني بعبر فيك رحيق
معابر هواك بقدسا
وأبقاك في الدارين عشيق
يا جنة هواي وسندسا
ياشامخه في القلب العتيق
أحلامنا ماعرفت قسي
لا شافت الود الرقيق
بس لساتنا نهرين من أسي
ومازلنا في الزمن الصفيق
لا الروض عرفنا نحدثا
لا صحينا من نومنا العميق

أنبــــل رفيــــق

تب ياصديق
الدنيا أكتر من مضيق
أياما أوسع من تضيق
إياك يا أنبل رفيق
في الدنيا عدمان المثيل..
يلاك نهوي الإقتراب
فرقانا أسوأ إغتراب
لاقانا وين الإستلاب؟
نتداوي من بعض العذاب
والجبنة في ضل المقيل..
حظوظنا وأن صابن نحس
أملنا وإن طاح وإنتكس
شوقنا وإن لحظة إلتبس
ماببقي زي عود التبس
متلنا في الفانين قليل...
تبعد يزيد عندي الألم
زهنا شريد لحظاتو كم؟
توصل تعيد فيني الألم
هل من مزيد من ها الألم؟
خليك معاي ألمك جميل..
لقيانا كان زمنا صعب
نتقاسم الهم والتعب
نتقاسم الروح والعصب
غدر الزمن صابو النصب
بيناتنا ما قادر يكيل...
أهديك دون الناس جروح

أجمـــــل هـــــلاك

بقراك سطر
وأفط سطر
و جواي تبقي مرتبه
بهديك روح
وأهديك عمر
بس روحي فيك معذبه
فيك ياما رهقني بوح
عيني في عينيك تمر
بنظره فاحصه مهذبه
طبيتي في الخاطر جروح
أبقاك من الشر بخور
و روحي فيك متوهدبه
رسمة خطاك في الأرض دوح
تذكيني من أجمل عطر
وخطاك بعيد متغربه؟
أقراك من فوق لي تحت
أشجار غناي فوقك تحت
وجواي هواك بيتنحت
وكل البشوفك ينسخط
يا مالكه ما بعد العمر
جواي إنتي مرتبه
أقراك شقيش تنقري
أهواك جواي أبحري
رحماك قط لاتزجري
في قلبي عيشي إتبختري
وقط لا توليه الدبر
خليك حبيبه مرتبه
أقراك سطرين لا يهم
أبداك من وين دون علم؟
ألقاك طيفين في حلم
واحد ظلوم وآخر ظلم
ألقاك في نص السطر
وحروفي فيك مرتبه
أقراك هم
أقراك من وين لاندم
أقراك حتي من العدم
ما جرحي في السطر إلتأم
أقراك لو طول العمر
وأشعاري تحت المرتبه
أقراك أجمل من ملاك
أقراك كيف والإرتباك؟
مكتوب عليك سامق علاك
مكتوب علي فيك هلاك
إبداك من هنا أو هناك
ما بفرقك عني السطر
وجواي ح تبقي مرتبه

عــــزاي إنــــك هنــــا

عزاي إنك هنا
مدثره بي شغاف قلبي
وموطنه في ضميري هنا
مشيتك خطوة لا قدام
وخطوات لا فتور لا عنا
وقلبا في هواك همام
سقيتي من القساوة ضنا
بكيتك دمعة الآلام
ضحكتي مع أعتذاري هنا
شكيتك والزمن حكام
هدمتي القلبي فيه بنا
ضحكت معاك وقلت سلام
عفتي الإيد وزدتي ضنا
سجدتك وفت لا قدام
غرورك فر بسمو سنا
وزدتي علي جفاك جفا
سبتيني و عميري فنا
كتمتك في جواي وفا
عبرتيني وفضلت هنا
رسمتك فيني قلتي كفا
مسحتيني وسبلتي غنا
بنيتك لا جحود لا من
هدمتيني وبريدك أنا
عزاي إنك هنا
مدثره بي شفاف الروح
مسكنة في حروفي غنا

فايتنـــي ويـــن؟

فايتني وين
سايبني للهم والألم
سفرك بعيد
وأنا ياصديق دماعي دم
بعدك وحيد
خضب صوابعيني الندم
زهني الشريد
في اللقيا ما قطع العشم
زمني العنيد
عودني فيك ألقي الملم
طبعك فريد
خلاني أحيا من العدم
يازول أكيد
أنا بيك سعيد
وأنا عندي متلك ياخي كم؟
يا مالي مابين الوريد
وبيني بين شرياني دم
أهواك وأريد
حبآ شدييييد
وهذا القصيد ما أظنو تم

بيــــك وبــــلاك ميــــت

بيك وبلاك ميت
لا تشيلي هم نوحي
لو ذنبي شان حبيت
معتاده العذاب روحي
لو صدقي عندك زيف
هجي وخلاص روحي

قلبي الرهيف مجبور
ينساك ويتناسا
دواديب مشاويرك
كم حددها وقاسا
لكن نكرتي الريد
وأنا ريدي فيك قاسا

ياأم قلبآ جحود
فوتيني دون رجعه
لا ليك بسوقني حنين
لا برمي فيك دمعه
ضوقيها نار البين
عيشي العمر وجعه

بيك وبلاك ميت
هاك شيليها أنفاسي
أنا في هواك ميت
وماكنت يوم قاسي
ولا تعودي لي دنياي
وتغازليه إحساسي

فجــــــــــــأة

فجأة
لقيتك ماقدامي
صحيت من حلمي وزدت كآبه
شوقآ بنهش في عضامي
وقلبآ واقد نار تقابه
وروحآ تلهث ودمعا رامي
وعين مشدوهه وفيها عصابه
فجأه
فقدتك في أحلامي
وخوفآ خيم فوقي سحابه
شح مدادك يا أقلامي؟
أم مل الريد نبديه كتابه.؟
عايش دنيا هواها ضلامي
عيشة حزينة وزايده رتابه
حتي الشعر الكان مترامي
ضل إلهامو ودخل الغابه
فجأه
إنكسر الحلم النامي
المدي حياتي صمود وصلابه
زاد ترديد اللحن الدامي
ليه أوردتي بقت ربابه
صوتي وحيح وغناي هلامي
وشعري نفق وأفكاري غلابه
يامسكونه بجن إلهامي
أرحمي روحا حبك صابه
فجأه
بريدك وفيك إقدامي
رغم الغربه الشد إرهابه
فجاه الفجاه تكون إلهامي
تلهب عقلي برود أعصابه
فجأه ألقاك هناك قدامي
أجيك ملهوف ماخداني صبابه
فجاه الحلم يموت قدامي
ودنيا بتنهش بي أنيابه
وأصحي الرعب الحلم الدامي
وأحيا عليك وإليك إنابه

أنــــا والجــــراح

قسمآ ياعيون
حزنك بزيد من حزني
عتمة تهد سماي
ريحآ تشتت مزني
نغمه تعيد أساي
ومين من قساي بنقذني؟

ماك شبه الهموم
وأنا والهموم تشبهني
حاتل فيها عوم
كل ما أفيق تندهني
حظا عندي شوم
عنك محال يشدهني

ماك حمل جراح
وأنا والجراح خلين
لازمني النواح
جواي كم ضدين
وكل ما يطل صباح
ألقي الحزن حزنين

أديني الألم
وشيلي الفرح وأحييبو
خلي لي قساك
هاك عمري بس أرضيبو
مابصيبك ندم
وسيبي لي منو نحيبو

لو بالإيد أطول
كل البصيبك فيني
أفديك لو أطول
راضي المآسي تجيني
عاد فيك شن أقول
والدمعه غمرت عيني؟

قط ما تشيلي هم
همك قسمت بشيلو
عبيني بقساك
كل دمعه توزن كيلو
خليك في علاك
الهم ملكني وهيلو

في آخر الكتاب
أمعنت فيك خشوعي
مرحبتين حباب
سكنك أبد في ضلوعي
وكل ما يجيك هم
قسمآ تغسلو دموعي

أحبــــــــــــك عمــــدآ

أحبك
أحبك حمدآ نبيلا
وشكرا جزيلا
حبآ نقيآ
عفيفآ شفيفآ
عشقآ جميلآ
أحبك شمعه
أصبك دمعه
أغسل همومك
أذوبك لوعه
أتوه بك
وأوعي
أغيب في جفونك
وأعشق عيونك
أحبك جنونك
أحبك عمدآ
جزرا ومدآ
أضل فيك عدا
ولو عشقي نقدآ
محال أشتريك
لأني أحبك جدآ
إبنآ وجدآ
جزرآ ومدآ
وأمدك مدآ
أحبك
حقيقه
وأفضل عيونك
بريدها وعشيقا
ولحظة بعادك
أموت لو أطيقا
بقيت في سجونك
حوار الطريقه
وبحبك
أحبك وأغني
بقربك أمني
بنفس التجني
وذات التمني
وتلك الجراح
وهذي الرفيقه
أحبك
آهه
أثير إنتباهه
أدوزن حروفك
أبوحك شفاهه
أنم ما بلمك
ألمك وأنمك
وأضل إتجاهه
أحبك جزرا ومدآ
وأمدك مدآ
أعدك عدآ
وأبذل عمري
لحبك عبدآ
فهل تعشقيني؟
وهل تنقذيني؟
وكم تبذليني؟
رويدآ رويدآ

إختــــــــــــبري صبـــــــــــري

إختبري صبري
وشوفي مقدار إحتمالي
تلقي حبك شادي أذري
وبيك إظهار إكتمالي
إختبري صبري وألميني
شوفي كيفن ببقي حالي
ليك ببذل كل عمري
ليك روحي ولا ببالي

إختبري صبري وإنتظاري
وشوفي كيفن بعشقك
إختبري إرهاقي ووداري
تلقيني يوت بستنشقك
ولو جفت فجري القماري
أهواك برضو وأعشقك
أرجاك عينيك وإنبهاري
وأعكس مغيبك وأشرقك

إختبري صبرآ فيك صبري
وأنا بنتظر لو باقي عمري
بنتظر يشرق صباحك
وينعكس في روحي دغري
بنتظر شلال سماحك
فيضو من دماعي يجري
وبنتظر تتمد راحك
وليك أمد الروح وعذري

حبـــيـــبـــه لـــــــــزم محـــي الديـــن ودالعقــــــدة

إخترتك تبقي لي
تبقي الحبيبه لزم
قلبي البريد عينيك
يمم إليك وعزم
ملهوف ينادي عليك
في جوفو نبضو رزم
حاولت أقيس الكون
جنبك لقيتو قزم
أبقيني ريد وحياة
إتخلطي في والدم
يا إنتي ياعشقي
وحبي البزيل الهم
أهواك حد الموت
حد اللحد ينضم
وأبعث مع ريدك
وبإسمك أسوي قسم
تبقي لي دين وصلاة
أتوضأ ليك زمزم
أبقاك نور من نور
لا خافت ولا مبهم
تفديك روح وجروح
قلبآ رقيق وأصم
حبك بقالي الروح
وبالعشره بيك بصم
حبك في نفسي يفوح
وكت النفس ينخم
يامالكه إحساسي
إحساسي بيك ملهم
يا ساكنة وجداني
وباقيه العصب والدم
أديني فيك أمل
حبة بصيص وعشم
وريني كيف أمشيك
بمشيك قدم في قدم
لا بكل معاك لا بمل
لا بغشي صبري سقم
بمشيك حد الموت
ولا المراد ينتم
وريني كيف أقراك
وأديني لوح وقلم
أقراك تاني وأعيد
ما بفط وحاتك سم
خليني مره ألقاك
وأسقيني بعدو السم
أحلف أقول لاقيت
أجمل ملاك من جم
وأحلف وأقول حبيت
لكنو عمري إنتم
وعزاي بعد لقياك
بي شوفتك حياتي ختم
ده أنا حاولت أقيس الكون
جنبك لقيتو قزم

قلبــــــي بيحتـــضـــر محي الديــــــن ودالعقــــــدة

بشويش علي قلبي الرهيف
ده قوامو خيط العنكبوت
والله ما بيحمل جفاك
قبال تجافيه بيموت
مسكين هو مابعرف خصام
بس شمسو لافيها الخفوت
وحظوظو واانحسي المرير
كل البريدو يهج يفوت
وما قطع عشم الحياة
لكنو لابد من يموت
شايل جراحو أسي وأسف
من حزنو كم بنسج خيوط
آمالو شالا السيل معا
وأحلامو بي نفس الشروط
لكنو أرهف من غنا
في جوفو كم سرحن يخوت
للريده والهم والبكاء
وأحزان تنادي بأعلي صوت
جواه إتمدشيطان الشعر
رحمانو لازمو فيك سكوت
قتليهو يا قلبي الرهيف
ما بنفعك تاني الستوت
رمضان وما بعقب عليك
وشوال خلاص هجر البيوت
لا حج ببل ريق إشتهاك
وإنت الضحية بلا شروط
لكنو ما قطع العشم
عشمان هواك يبقالو قوت
عشمان لقاك رغم علاك
وما بينو بينك ألف شوط
أنفاسو مقبوضه و تهب
مخنوق كأن البالعو حوت
لاضفه لا نيل لا عشب
دمعاتو بغرق فيها يوت
والله ما قطع العشم
لكنو لا بد من يموت
وجد فيك ما قطع العشم
وبلفظ أنفاسو يفوت

ما أروعــــــــــــــــك محــــي الديــــن ودالعقــــدة

ما أروعك
وكتين تغيبي وأشتهيك
ما أرفعك
وكتين تناديني واجيك
ما أكملك
وأنا فيني منك ومني فيك
ما أجملك
وأنا من هواك وهواي عليك
ما أنبلك
يادوحة الصدق المفرهده وألتقيك

ما أتعس
الحظ البسوق خطواتي عكسك وأندهش
ما أتعس
العمر البقضي بعيد وإبليسي منك يتهبش
ما أتعس
الحب البسيب الحب مشتت ومرتعش
ما أبخس
الشوق البودر شوقي والشوق في الدواخل ينكمش
ما أتعس
الزول البريد ويداري ريدو بلاعذر
تتصر أمالو ويمش

ما أخبث
الزمن البسيبني أكابدالآلام وحيد
ما أخبث
القلم البيكتب غير حروفك حتي لو حرفك عنيد
ما أخبث
القلب البيعشق غير جروفك ويسقي في الجرف الصديد
ما أخبث
الدمع البيضرب موجو من تالاك خديد
ما أخبث
الريد الببكيك مني يشكيك عني
بس خليك حديد

ما تبقي
غير وعي المشاعر بالغنا
وماببقي
غير أمسح دموعك والعنا
ما تبقي
غير هدف الأحاسيس والمنا
وما ببقي
غير أعشقك وأهواك أنا
وماتبقي
غير أبقيني أو أبقاك أنا

قســــــم بهــــــواك محــــــي الديــــــن ودالعقــــــدة

قسم بهواك
قسم غيرك محال أعشق
قسم ريدك
حباني بروح محال تنفق
قسم أغلظ
بصوت مبحوح يجرح في كياني حلق
محال متلك يكونو إتنين
وغيرك ما بقالي خلق
فريد طبعك لقاك وجفاك
فريد وصلك وجودك شق
وكل الدنيا في جانب
تكونلك شق
قسم دونك
حياتي جحيم
وبقبل في هواك الرق
أكون عبدا وديع ومطيع
فداك عمري وحياتي أنفق
بلاك قطعا حياتنا عبوس
جراحا إلتئامها فتق
قسمت قسم
ودون أقسام كلامي صدق
وجودك ينعش المعلول
ويلصف في حياتو برق
حتي المتلي أنا ومعزول
وبجابد في حياتو نتق
يناتق وصلك المحبوب
يرتق بينو بينك شق
ملاكا لا وجود بعدك
عذابا في جحيمو حرق
فلا ضنك بحسبو أفول
في نورك كياني غرق
ولدت بعد عمر مشلول
مشيتك وعمري فيك يفق
فقت بعد ثبات وعذاب
سعدبك يا ملاك الروح
معاك يفضل طريقي صدق
صدق لا فيه ريب لاشك
ولا بعرف سواك عشق

بستأذنك محي الدين ودالعقده

بستأذنك أبدأ المغيب
وأستأذنك ارحل بعيد
اديني خاطرك والعفو
وسامحيني بتألم شديد
بفسح مساحتي عبور خطاك
وأحزم متاعي حزن أكيد
افرد شراعاتي وأغيب
من دونك الحياة ما بتفيد
أرفع يديني اودعك
في جوفي نيرانا تقيد
قلبي نبضو وقف بلاك
روحي والبال الشريد
عينيا تتقاطر دما
دمعاتا خالطت الصديد
ولساني ماعاد فيه روح
ايديا والاطراف حديد
فؤادي كان مخبأ هواك
في جوفو إتصلب وريد
أحشاي كان للغيظ كظام
في الريده ماعاد ليها ايد
مشدوهه إحساساتي الرهاف
مخنوقه من قدري العنيد
مفطوره أفئدة العشق
عارفاني ما بصبح سعيد
مشلوله اطرافي وبكاي
ياغاليه ما ظنيت يفيد
مكتوب علي أموت كمد
والحسره والطرف السهيد
اديني خاطرك شان اصل
وداللحد واكون سعيد
أتوالت الالام علي
وأنا اصلي غيرك ما بريد
لا تبددي الامل الفتح
طاقاتو والعمر الجديد
بستأذنك جواك افوت
واغمر مساماتك وداد
لو لحظه اديني الإذن
قبال اغيب ونكون بعاد
خليني أشرح لك هواي
وكيفن بكون طعم السهاد
كيفن خلطتك في دماي
وبقيتي للروح أحلي ذاد
كيفن رشحتك في غناي
وبقيتي للنبض إرتداد
آمنت بيك بلا شروط
وأعلنت في نفسي الجهاد
وسجدت في محراب هواك
وصبحت فيك أتقي العباد
لو ريدي ما بوصل علاك
أحسن لي أكون كشحة رماد
وأرجاك في ارض النعيم
يمكن يوافقني الوداد
نتلم في حوض النبي
ومن تاني ما بحصل بعاد
وأناريدي ليك ما انبلو
يشهد علي رب العباد

الحلــــم الخالــــد محــــي الديــــن ودالعقــــده

آز يولايك وخليك جنبي
وفي اعماقي إتسربي فوتي

افضلي فيا تطهري ذنبي
دقة نبضي وحلم سكوتي

أسكني فيني وبرقك يشلع
يكسر الضلمه الساكنه بيوتي

وابقي ملاك الحلم الخالد
ببقي قرينك وبين إيدينك عيشي وموتي

تبقي ملاذ الروح الشاحبه
وفي انفاسي ونبرات صوتي

أحيا معاك واديك حياتي
ولاتسيبيني براي وتموتي

ما بتحمل اصلو بعادك
ولا بستحمل مني تفوتي

فوتي جواي خطواتك ماهله
وآزيولايك عربدي جوطي

بفرح بيك ومسامي تفرهد
وأنزف بيك احزاني الخالده
يرحل مني شقاي وخفوتي

وأبقي إنسان مولود من تاني
كلي أحلام آمال وأماني

تبقي حياتي النابضه مشاعر
يبقي في حبك كل ايماني

تبقي مصيري البحلم بيه
ابقي اسيرك وفيك وحداني

أكتب ليك أشعاري وأغرد
وفي بستانك احلي أغاني

مؤمن بيك يازوله أصيله
وفيك بستحمل إني أعاني

بس في الاخر بكتب حرفي
أبقي معاي النصف التاني

ولما اموت وأغادر الدنيا
في قلبك يصبح تابوتي

آخـــــــر آمالـــــــي محي الديـــــــن ودالعقـــــــده

آخر آمالي
محي الدين ودالعقدة

وانا مستني رماد احلامي
يصبح جنة ودانيه غصونا

فيها تعيشي معاني الفرحه
تبقي معاي طعيمه ولونا

تبقي الروح السانده عضايا
فيها تكوني واكون مفتونا

الا النحس ملازم روحي
حتي اقداري بقت مجنونه

معاي لابد تسوي الواجب
تسلب روحي بواقي حصونا

وكنت مأمل فيك أغني
وحتي حروفك نفسي اصونا

تدي حياتي معاني جديده
الا حياتي أظن معيونا

تبدأ سعير وختامها مآسي
وفي الاعماق مغروسه قرونا

الافراح ما بتعرف دربي
قيود الامي بقيت مسجونا

الا خلاص ضلت خطواتي
روحي بقت قاتمه ومحزونه

كل مناي ألقاك في قربي
وصلة ريدنا تظل مقرونه

تبقي غناي ومعاي تنطربي
ترشدي نفسي وتبقي عيونا

تبقي الراحه السابت دربي
تهدي أقداري تعالجي جنونا

تطبي الجرح النازف سربي
وفيه احزاني ملانه سنونا

تداوي سموم الهم في قلبي
وإلفه زمان فاقداه سكونا

تبقي النعمه هدية الخالق
تبقي العفه الفينا مصونا

تبقي معالم الفرحه الخالده
وما ترضيلي أعيش من دونا

توهبي روحي وطن وملامح
تبقي حياتا وتصبحي كونا

روحي هواك وهواك حياتي
وبيك اقداري قسم مرهونه

فيك ملجاي واخر امالي
اديني هواك يبقالي معونه

سبحـــــــــة بكـــــــــاي محـي الديـــن ودالعقــــــدة

شفتك؟ لاسلام منك
ولا نجمك بصيبو افول
يامالية الأرض تحنان
زاربالي الوطن بالطول
وطنا لي في عينيك
وعينيك ياوطن مسدول
ولا عارف طريقك وين
ولا عارف بلاك وصول
وشفتك؟ لا سلام منك
ولامنك غشاني رسول
رسولا ما نقل صوتك
ولا صمتك هزيمة قول
يظل فيك اندهاشي غنا
وغنايا من قلب مشلول
هولا عارف طريقك وين
ولا دونك عرفلو وصول
شفتك؟ لا سلام منك
ولا بشفع لسان معسول
ولا نبضا ينادي عليك
يناديلك صرخ مخبول
بلاك ما بتصلح الكلمات
ودونك يتلف المحصول
وحاتك لا وجود بعدك
ولا بتعقب علي فصول
بشوفك انتي في الاحلام
تتميني وتفوتي الحول
وإن شفتك قبل قدام
يتاورني إندهاش وذهول
ولساني الفصيح تمتام
والشوف ينكسر مذلول
وكيف أصمد بدون احرام؟
وكيف كعبة وجودك اطول؟
بشوفك في حجر اسود
وفي قلبا نقي ومغسول
وفي البدر التمامو انتم
وفي العشق الصبح مهمول
وفي سبحة بكايا عليك
وزولا بي هواك مأهول
وفي بعدا بدون أعذار
وفي ريدا جواي مكتول
ولا عارف طريقك وين
ولادونك عرفلو وصول

داويلي احزاني محي الدين ودالعقدة

لازلت بك ممكون
لازلت في أشجاني
لازلت بيك مجنون
في الدنيا وحداني
لازلتي في روحي
في عمق وجداني
ودونك حياتي جحيم
ومحال احب تاني
ماانتي في دنياي
يا روحي مالياني
اختي وابوي واخوي
امي وفؤاد حاني
صديقه نعم الحال
وحبيبه مالكاني
إختاري كيفن اعيش
احياك من تاني
ولا اقبضيها الروح
داويلي احزاني
الفرقه نارا يمين
حتت لي اغصاني
بعدك صلاني جحيم
في الدنيا اقصاني
قربتي من دنياي
خضرتي بستاني
هجرتي دنيا غناي
هديتي اركاني
وبقيت وا اسفاي
الوحده هالكاني
اختاري كيفن اعيش
احييني من تاني
ولا اقبيضيها الروح
داويلي احزاني
دونك قسم دنياي
نيرانا لافحاني
هقلانه من عطاي
يمنحني اوزاني
ضبلانه من سقاي
بالوحشه قاصداني
يبسانه حتي اعضاي
تتمني هجراني
تتمني هسه اموت
ذكراك اكفاني
وأقطع حبال الصوت
طاريك كفاني
اختاري كيفن اعيش
احياك من تاني
ولا اقبضيها الروح
داويلي احزاني
الموت مصيري اكيد
ما طال ماباني
فوقك خلاصة القول
من اصدق الحاني
ياكي العشق ياروح
أملا كبير باني
انتي المقدس لي
طعم الحياة الهاني
نجمي البهر بالضي
في دنيا ظالماني
سبح بحمدك انا
وكبرتبك شاني
سجدت في محراب
عينيك يا واحشاني
وصبحت بك اواب
أحييني من تاني
ولا اقبضيها الروح
داويلي احزاني
قبال حبيبتي اموت
انا قلبي اوصاني
اني اغتسل برضاك
وعفوك أكفاني
وإستغفرك ألفين
إتوسلك تاني
وإني إندفن جواك
جنبيك ضاماني
وإنك تصلي علي
قدر انتي حاباني
وقط ما تجيبي دموع
او تحزني عشاني
لأني ليك مكتوب
في العالم التاني
برجاك في الفردوس
في قصر مرجاني
ولا تنسي محبوبتي
جواك عنواني
اختاري كيفن اعيش
أحييني من تاني
ولا اقبضيها الروح
داويلي احزاني

قســـــــــــوة صـــــــــــــــــــــداع محي الديـــــن ودالعقــــــــــــــــده

مالك يا الصداع
باقيلي في تولاتي
زايدلي الهموم
 رادف علي علاتي
شاكيك يا وهم
باكيك في مصلاتي
داعيك بالعدم
من الزمان الاتي
مالك يا لئيم
مندسي في غنواتي
في بحر الشعر
بي مركبك حواتي
مقدافك سيوف
يتبلو في دمعاتي
مالك يا الصداع
 طابق علي اهاتي
زايدلي الوجع
خارب علي صلاتي
حاجرلي الدروب
 قاطع علي صلاتي
شايفك تنبسط
يوم يكترن اناتي
تتمغي وتنط
تشهقني في زفراتي
تدخلني وتجوط
تكسر جدار صناتي
تلكزني وبقع
لكزة غليدا عاتي
واقعك ما بقيف
واقفك مشيهويتاتي
اريتك كنت زول
كانت دواك عصاتي
عكازي اب عكن
بي ضبتينو يهاتي
لو عصت العصا
بتجيهك نعلاتي
اريتك كنت زول
فوقك افش زعلاتي

تعبك راحه

تعبتيني؟ ده تعبك راحه
راحة زولا عمرو بعاني

بلقى عيونك اجمل واحه
بكتب ليك يا غاليه معاني

بملا الدنيا قريض وفصاحه
بهدي قليبك احلى اغاني

كوني اشوفك ياها احلامي
وكل الدنيا تجيني تهاني

تعب الحب ياحلوة حلاتو
نار الحب فوقك لافحاني

احلام عنتر ما بتلحقني
وقيس يا ليلى بعيش وحداني

حبا ليك م عاد يتكرر
رغم الفانيه الجات قاصداني

ضدي تسخر كل جنودا
سيوف ورماح تسكن وجداني

سما شايلو رويس الخنجر
ينتح ويقدح يوم ارداني

وانا في انفاس الشاعر بطلع
طيف ذكراك باارد جاني

من دوبيت الباديه ظهرتي
اتشكلتي ملاك من تاني

انقذتيني وطبتي جروحي
اتداويت ما مرو ثواني

في غنواتي حفظتك راكز
رغم الحزن الاتحداني

رغم العمر العشت مرارتو
دنيا حناضل قاطعه لساني

حروفك شفتها تب فرهدت
خدر خيرك في بستاني

بيها سعدت وردت روحي
تاري جبنتك هي الرامياني

الحرمان

اقدار مكتوبه نعيشا
غصبا عننا يا احبابي

عصفوره منتف ريشا
في اغصان الريده تشابي

تقع وتقوم لافوق بشويشا
يا حبان مجبوره تشابي

حال الدنيا وطبع العيشه
فوقا نسور وصقور الغابي

ديك ثعالب قايم نيشا
قوي ضراعك جاك الدابي

قبيلة نملك زاد نتيشا
وا اسفاي انهد شبابي

الاغصان بعدت مافيشا
ضبعا ياخ بوظ اعصابي

الاشبال ما اجمل طيشا
زادو شقايا وعرقا صابي

داك صبي اعشاشي ينيشا
يرهق قلبي يزيدو عذابي

الحرمان لو كان من ريشه
ينخر عضم الزول الحابي

راعي الوداد محي الدين ودالعقده

يا الضاروك بعيد عن عيني
شايفك قلبي وشوفو يحير

ما عرفوك يا حلوه يقيني
رفة قلبي ضياهو النير

لوشافوك او شافو حنيني
بعد البين ما قالوا بغير

لو ودوك الشرق الصيني
بوصل ليك راتع ومتدير

لو رفعوك في نبع العيني
بتبخرلك اجيك في قصير

لو دلوك في الجب واصليني
بمرق ليك والقافله اسير

لو شالوك او قطعو يميني
برجع ليك والعمر قصير

انتي رضاي ومناي وحنيني
رفة عيني ودقه قلبي

من تحنانك شيلي اديني
ومن بسماتك كيلي وعبي

بحفظ ليك والقلب ضميني
فوقي جمايلك شرقي وغربي

بس اوعاك اوعك تنسيني
ختي في بالك ريدي وحبي

انا البرعاك برعاك زي ديني
ارعي ودادي وفوقو انكربي

انتي خيالك باقي قريني
في الاعماق عايش متربي

ولما رسالتي تجيك قالديني
حبا ظاهر اوعي تخبي..

ضي بتي محي الدين ودالعقده

طال الزمن او قصر
اكيد يا حلوه نتلاقى

نسوق خطواتنا للنجمات
ضياك يخفت اشراقا

اقول البهره ضي بتي
سناها يضوي براقا

نعيم الدنيا عينيها
سلام العالم اخلاقا

حلاوة البسمه تاريها
طعيم الجبنه حراقا

سجارتي وكت اداريها
اخاف تتكرف العاقه

اخاف يا فاطمه نتفرق
طبيعة الدنيا فراقا

سميت امي البغنيها
غنايا ماهو طرباقا

ينقع زيرو بالتحنان
يطمبر وتتملي الباقه

اذا قسمنا للحبان
يكفي وتعدم الفاقه

ونزرع باقي في الوديان
فرايد تنقسم ماقه

كرجو نمرقو للاخوان
ارادبا مي حمل ناقه

حبا ليك في جواي
كانو الجنه واعماقا

بشيل الليل واتقلب
يمين وشمال واتقلب

اهضرب دمعتين وضحك
اسابل حظنا التلب

اضحك بابا في اضني
ابكي ومهدك اتغيب

ابسم وحجري واللولاي
اعبس والدموع تنصب

اشيل انفاسي واتنهد
بكاك خلاني اتعصب

تعالي نصلي نتحصن
ونقرا تشهدك نلعب

نسوي حصانا بالمسند
فوقو تفلخي ونركب

نلكع مسرعين بالعافيه
نوصل وما بنتوهدب

نصفق ايدي في ايدك
فجاه نقيف ونتهنضب

نضحك وننبسط يافاطنه
اقالدك والعمير اشيب

ابوك يا فاطنه حباك
حبا ما بيتقلب

وبكره الموت بلاقيني
ومناي قبالو نتلاقى

الاحد ٧ /٧ /٢٠١٩
٤:٠٠ ص