ما لقيتك

قذفتك في حشا الكلمات
حملت بيك بنات اشعاري حسيتك
وليده في غنية تاتيتك
وأرضعتك مشاعر حلوه
صدق احساسي ربيتك
رفعتك فوق سوامق الكون
وفوق امالي عليتك
سقيتك من سلاف احلامي
دون خلق الله حبيتك
وادمنتك
وعشقك من سمع اشعاري
في أحشاها آويتك
هربتي بعد غناي بتق
سأل لكني مالقيتك
سألت عليك في الساحات
ومالقيتك
افتش ليك في الماقات
ومالقيتك
وفي الشعر النزف آهات
ومالقيتك
سألت عليك كم احباب
ومالقيتك
وفي وطنا كتير اصحاب
ومالقيتك
وفي دربآ صبح داداب
ومالقيتك
خلاص اديتك الدكه
اديني معالم السكه
عشان تلقيني نتناجا
تجينا الريده افواجا
وأحلم بك بلا عداد
يجينا من العشق امداد
نعيد للريده انتاجا
وبي اشعارنا نتحاجا
وما لقيتك

الحارمنا

يا الحارمنا من شوفت حبيبنا ومانع
شاحد المولي و للمظلوم دعايا واقع
الخلاك في بحر المكاره ناقع
يحرمك من نفس لا يبقى نازل وطالع

يا الحارمنا من شوفت حبيبا ضغينه
شاحد ربي وللمظلوم دعايا عِينه
الخلاك في كهف الضغينه رهينه
يحرمك في الحياة ما تلقى فيهاسَكينه

يا الحارمنا كجناك وريحك فاحت
شاحد المولى للمظلوم دميعتا ناحت
الخلاك في برك الودار تتباحت
يشل الايد ودماعك مرستا ساحت

يا الحارمنا كضبنا السمع والشوف
شاحد الواحد الاحد الصمد معروف
الخلاك من دون الخلق مصروف
يعميك الله و الشلوفه تصبح صوف

يا الحارمنا ماك عارف الببر والدينو
تعدل خطوتو والدعوات يغطن شينو
الخلاك في صف ابقرون وتعينو
يحكم بينا لا بيتغشٌَ لا بتهينو