زيف ابتساماتي

ما شفت زيف ذي زيف
برق إبتساماتي
لافيهن سحاب لازيف
بس ضارو دمعاتي
ده الحب طريقو مخيف
وبنكأ جراحاتي
قط ما لقيتو ظريف
لكنه بعاتي
وأنا في ودادي حريف
وبعرف شنو الآتي
فاكر ضليلو وريف
لكنو  ضل شاتي
وأنا يا سحابة الصيف
نظمت غنواتي
ظنيتي جرحي طفيف
وأهملتي جرعاتي
ده أنا كنت فيك شفيف
وزدتي إبتلاءاتي
أمعنتي في الكتيف
حجمتي خطواتي
هجرتي حتي الطيف
والباقي لوعاتي
لو فاكره دمي خفيف
شيليها ضحكاتي
ده أنا دمي كلو حفيف
و الشاهده آهاتي
لا بزور قفاري خريف
لا بتصدف سحاباتي
أفضل كسيح وكفيف
والعبره في الآتي

إلهام عيونك

كلما اكتبلك اغاني
فيكِ بشوفن شويه

وانتظر الهام عيونك
كان يبتق في البريه

لو الم الكون جميعو
واشيلو في أطراف ايديا

ما بكفي إحساسي بيكِ
ولا النجيمات والثريا

ما بقاربن لي مقامك
ولا بطولنك شوِيّه

يا البعيده متل وصالك
يا القريبه انوار وضيا

يا الجفاك هالك قليبي
سوي من حنك عليا

سوي حبه تزيد شجوني
كبي منو وعبي ليا

رجعي الهام القصايد
الحروف صبحت عصيه

روحي تكتب دون أفكر
وهسه بالافكار شقيه

لا قصيده تبلو ريقي
لا الظروف عادت نديه

انهزم فيلق مشاعري
يوم بكت بالشوق عينيا

لا بقيتي كما عهدتك
ولا الأغاني شفيعه ليا

الا طيفك يا حليلو
ما بفارق مقلتيا

مره ننضم ومره نضحك
مره نتسابق عشيه

مره احلم فجأة ابسم
اصحى والخدين طريه

اغضب اغضب من دموعي
هن سبب هذي الاذيه

افرح افرح من دموعي
هن دليل روحاً وفيه

اغضب افرح من دموعي
ما البعاد نيرانو حيه

شن نسو؟ أقدارنا قالت
نرضى بالقسمه العليّا

مابهم لو أشقى وأشقى
بس سعادتك يا بنيه

محي الدين ود العقدة

زمان الجرح

زمان الجرح
زمان الجرح ما ودع
زمان الفرحة ما طل
فضل باب الحبيب مشرع
وحبي تملي ما ظل
تساب ريدنا وبروق تشلع
تسرب حبي انسل
صبح قلب الحبيب خالي
فقد وهج الطريق ضل
حبيب لكنه متعالي
قلبي هواه ما كل
جرح كل الجروح غالي
فلت في خطوتو و زل
رفعته انا في مكان عالي
تنصل عني واندل
خذل في عمقي اقوالي
بذل كل الجفا وذل
هدم متواضع امالي
غرور لا كل لامل
تعيس في كل احوالي
حصنتك برعاية الله

آز يو لايك

آز يو لايك وخليك جنبي
وفي اعماقي إتسربي فوتي

افضلي فيا تطهري ذنبي
دقة نبضي وحلم سكوتي

أسكني فيني وبرقك يشلع
يكسر الضلمه الساكنه بيوتي

وابقي ملاك الحلم الخالد
ببقي قرينك وبين إيدينك عيشي وموتي

تبقي ملاذ الروح الشاحبه
وفي انفاسي ونبرات صوتي

أحيا معاك واديك حياتي
ولاتسيبيني براي وتموتي

ما بتحمل اصلو بعادك
ولا بستحمل مني تفوتي

فوتي جواي خطواتك ماهله
وآزيولايك عربدي جوطي

بفرح بيك ومسامي تفرهد
وأنزف بيك احزاني الخالده
يرحل مني شقاي وخفوتي

وأبقي إنسان مولود من تاني
كلي أحلام آمال وأماني

تبقي حياتي النابضه مشاعر
يبقي في حبك كل ايماني

تبقي مصيري البحلم بيه
ابقي اسيرك وفيك وحداني

أكتب ليك أشعاري وأغرد
وفي بستانك احلي أغاني

مؤمن بيك يازوله أصيله
وفيك بستحمل إني أعاني

بس في الاخر بكتب حرفي
أبقي معاي النصف التاني

ولما اموت وأغادر الدنيا
في قلبك يصبح تابوتي

ألقاك

ألقاك بين السمع والشوف
رهاب دمعآ سخين لاخوف

سوي بعد الوهج والبين
وبين شمسك وعتمة جوف

سكن فيهو الرهق مجروح
دفر فيهو السكات محفوف

ولا رجعة ضياك بتزيد
ولا بتمحق صدي المألوف

وأظل جواك مجرد من حلم ماضي
ومسلوب من حزن مصفوف

وأعيشك زي فرح زابل
رغم إنه القلب ملهوف

وأخاف لك من عذابي دوام
معذب خوفي منك خوف

وإشتاقلك بلا عداد
ولا بتحسب سطوري حروف

ولا بترهق خطاك دمعات
لا بفضل وفاك مكتوف

وألاقيك ياقدر محبوب
لقايا ما بتهدو ظروف

وأمرق لك وفاي من جم
إخلاص وإلتزام مظروف

لا صابو الزمن بهتان
ولا شاهت دواخلو حذوف

ولا بتبهت معالمك يوم
ولا بتصيب هواك صروف

وأغزل لك غناي فستان
وأزفك وقلبي نبضو دفوف

تعالي مع البياض نفرح
عشان يبقي السواد مصروف

تعالي مع الوداد نسرح
عشان يبقي البعاد مخسوف

وأعيشك في حلم وردي
وأرتب حبي ليك مصروف

ضريح الجور

ضريح الجور

سويت لك
ضريح جواي
ودفنت بواقي أسرارك
برجع لك وكت
أضهب أفتش
باقي أنوارك
وما كل الفي
الضريح صالحا
يمجد فعلنايبارك
لكن نتعظ منك
يمكن نلقي
مرافئ اعزارك
ما بين الصليح
وحسود
داهية، مصليا، تارك
ضريحك كان
ضريح ظلمك
وجورا تتلهب نارك
تحرق ناضر الافراح
تهدم في البدء دارك
ضريحك فيه كم طفنا
وهضلم عقلنا الدارك
قريبا شوه أحلامك
صليحا عمرو ما دارك
هواه وشرعته الابليس
وأنا العندك كحوارك
رفعتك فوق رؤي الانسان
أقبل أخمص أقدارك
وأرضاه الهوان والذل
أدوزن أنبل اشعارك
وأرفع صوتي بالاذان
تعيشي وتبقي عالية كمان
ينشف حلقي بالتسبيح
يغص في حلقي عوارك
أطوف في كم ضريح وضريح
هواي اتغمصك صارك
لكين القدر حكام
دون خلق الله اختارك
تكوني الغصة والاوجاع
تبل ريق الحروف نارك
لكن يا سبية الريد
حذارك ثم حذارك
حذارك من زمن غدار
حذارك تنضب انهارك
حويتك في الضريح عمدا
خوف من تزبل ازهارك
وما كل الفي الضريح اموات
ضريحك مخزن اسرارك
يظل جواي واطوف بيك
محال ان تخبو انوارك
اشيلك نغمة للتهليل
يوم يجفوك سمارك
اداعب بيك هويد الليل
وكت ينسلو زوارك
بعيد عنك بعيش مغبون
بعيد جواي تظل دارك
اما النوح ودمعي السيل
كفيل بيها الذي جارك
يجير عني السفاح في هواي
يصلح ناقع أشعارك
وحسبي الله
حسبي الذي سواك
وحد مدارك ابصارك
ضريحك يبقي في جواي
ضريح لا شرك لا شارك
لا الاخلاص بهم ميتين
ولا الكذبه بتهز سارك
ولا بنهي الوداع حيوات
مادام في الفؤاد دارك
ودعتك الله في جواي
يصونك انتي ويبارك
يحفظ من قريب وبعيد
ويكسر سهم غدارك
ودعتك في الضريح جواي
أطوفك عبره لا شارك
               
                  

شموس الحن

جيتي قبل صحاي ينفد
جبرتي الخاطر المكسور

قبل اغمد عيون دامعات
واسكن بالفجيعه قبور

مليتي علي حياتي غنا
اماني وابتسام و سرور

صحت كل الاماني معاك
بعد صابا المحل بالدور

ضحك حظ السنين السود
بعد زمنا سحيق مصرور

وفكت صرمتا  الاحلام
بعد ريقا بحسبو دهور

معاك اتوالت الافراح
علي قلبا حزين معبور

وروحا شاحبه بالالام
كساها وهج وصالك نور

سحاب حنك علي مطر
غمر كل الخلايا البور

معاك شرقت شموس الحن
دفر بين الضلوع النور

مقرين الجن

مقراين الجن
يا الرهقت قواي
أصلي لازم أجن
لو فضلت معاي
العيون طشن
زادن علي أساي
الطرق لجن؟
ولا لجو خطاي؟
النفس بيصن
والقلب دوداي
الدموع يعصن
يمرقن بي جاي
يارويس الجن
وين نهايتو قساي؟
الحبوب شحن
لا هناك لا جاي
أصواتي فيك بحن
ماكنت يوم شكاي
فات زمان الحن
والنعمه من عطاي

عينيك

عينيك في مشيهن

عترن في يراعي

في لحظة مجيهن

مغيبب فيك وواعي

محل يمم وشيهن

يلاقن حن ضراعي

لا بيغفل بديهن

لا بملن سماعي

رموشا في وطيهن

لحظات اجتماعي

كم بحلم اجيهن

بي كل التياعي

الاسرني بيهن

يا انبل مساعي

طيبه وعفه فيهن

وليهن الله راعي,,,

الشوق لعيونك

الشوق لعيونك
عذبني,,,
شهاني العافية
وغلبني,,,
شتت افكاري
وغيبني,,,
من دنيا بتهدم افراحي
محترفة عذابي وترهبني,,,
لكن دعواتك يا غالية
من دركي الاسفل
تنقذني,,,
يرجع لي احساسي
المتبلد
بالامل الابيض
تلكزني,,
عشان اوعي واحسب ايامي
ساعاتي وعمرا غايظني,,,
اهديك سلافة ما امكن
والروح تفديك بطيب خاطر,,,
وانا قلبي بحبك واعظني,,,,
جافيتا مداينك
دون خاطر,,,
رجعني صداها
وراقصني,,,
بس حسي هداني
اتحداني,,,
عن حسنك وطيبك
حدثني,,,
دي اميرة
وعافية ومتعافية,,,
ارعاها وراعي,,,
لاتشني,,,
حاسب لاتكسر خاطرها,,,
ولا تنسي وجودها الواحشني,,,
وكان عارف:
عشقك يا روحي,,,
في حياتي
اساسا طرطشني,,,

الدمعات

ازرف الدمعات فرحا
فتفيض في الخدود العسجديه
آت اليك بلا تعال
او طقوس موسميه
آتيك من حيث انتهت
كل الحروف الابجديه
آت كما غيم المحنه
احمل الشمس سراجا
والمطر غسل يديا
فتعالي لا تعال
في تفاصيل الحبيبه
شدي الرحال الي فؤادي
والتقيني قرب
اشواقي الغريبه
فانا اشتاق دوما
للمواجع
والحكايات الكئيبه
ادمنت في هذي المدينه
ان اسمع اللحن النشاز
والاناشيد المريبه
هكذا لازلت احلم بالتغير
لازلت ابحث عن حبيبه
فتعالي
لاتسلط في حياتي
لاشكوك ليس ريبه

فقداسة العشق
حطام في المدينه
وحطام العشق
شيء صار مني
وغموض الحب
يخلع في جلابيب التمني
كلما يخلو بها
تنبت اخرى
تسترد الحلم مني
هكذا نبقى اسارى الزيف
والخدع التجني
فانا غيرت نفسي
كي اكون العاشق
الولهان اني
فتعالي
لا تعال
فالحبيب هو الحبيب
فلا تظني 

قلبي الموجع

يا وداد قلبي الموجع
يا مداد شعري البريدو
يا فرح كم فيه بطمع
اتكا ومدالي ايدو
بالسعاده لقاك مفدع
فوقي اتمايل جريدو
لملم القلب المفرزع
يقنو وقرب بعيدو
اصلو في اهواك بدع
التأم شوقي وقصيدو
من سماك احساسي نقع
نم في الاشعار فريدو
بالفرح دماعو دمع
وبالسرور سفر بريدو
يا شعورا ما ترفع
لا كسر خاطر مريدو
ليك فارد قلبي مشرع
شذبو وهذب عنيدو
غني في جنباتو ارتع
وانتقي النظم التريدو