عينيك

عينيك في مشيهن

عترن في يراعي

في لحظة مجيهن

مغيبب فيك وواعي

محل يمم وشيهن

يلاقن حن ضراعي

لا بيغفل بديهن

لا بملن سماعي

رموشا في وطيهن

لحظات اجتماعي

كم بحلم اجيهن

بي كل التياعي

الاسرني بيهن

يا انبل مساعي

طيبه وعفه فيهن

وليهن الله راعي,,,

الشوق لعيونك

الشوق لعيونك
عذبني,,,
شهاني العافية
وغلبني,,,
شتت افكاري
وغيبني,,,
من دنيا بتهدم افراحي
محترفة عذابي وترهبني,,,
لكن دعواتك يا غالية
من دركي الاسفل
تنقذني,,,
يرجع لي احساسي
المتبلد
بالامل الابيض
تلكزني,,
عشان اوعي واحسب ايامي
ساعاتي وعمرا غايظني,,,
اهديك سلافة ما امكن
والروح تفديك بطيب خاطر,,,
وانا قلبي بحبك واعظني,,,,
جافيتا مداينك
دون خاطر,,,
رجعني صداها
وراقصني,,,
بس حسي هداني
اتحداني,,,
عن حسنك وطيبك
حدثني,,,
دي اميرة
وعافية ومتعافية,,,
ارعاها وراعي,,,
لاتشني,,,
حاسب لاتكسر خاطرها,,,
ولا تنسي وجودها الواحشني,,,
وكان عارف:
عشقك يا روحي,,,
في حياتي
اساسا طرطشني,,,

الدمعات

ازرف الدمعات فرحا
فتفيض في الخدود العسجديه
آت اليك بلا تعال
او طقوس موسميه
آتيك من حيث انتهت
كل الحروف الابجديه
آت كما غيم المحنه
احمل الشمس سراجا
والمطر غسل يديا
فتعالي لا تعال
في تفاصيل الحبيبه
شدي الرحال الي فؤادي
والتقيني قرب
اشواقي الغريبه
فانا اشتاق دوما
للمواجع
والحكايات الكئيبه
ادمنت في هذي المدينه
ان اسمع اللحن النشاز
والاناشيد المريبه
هكذا لازلت احلم بالتغير
لازلت ابحث عن حبيبه
فتعالي
لاتسلط في حياتي
لاشكوك ليس ريبه

فقداسة العشق
حطام في المدينه
وحطام العشق
شيء صار مني
وغموض الحب
يخلع في جلابيب التمني
كلما يخلو بها
تنبت اخرى
تسترد الحلم مني
هكذا نبقى اسارى الزيف
والخدع التجني
فانا غيرت نفسي
كي اكون العاشق
الولهان اني
فتعالي
لا تعال
فالحبيب هو الحبيب
فلا تظني 

قلبي الموجع

يا وداد قلبي الموجع
يا مداد شعري البريدو
يا فرح كم فيه بطمع
اتكا ومدالي ايدو
بالسعاده لقاك مفدع
فوقي اتمايل جريدو
لملم القلب المفرزع
يقنو وقرب بعيدو
اصلو في اهواك بدع
التأم شوقي وقصيدو
من سماك احساسي نقع
نم في الاشعار فريدو
بالفرح دماعو دمع
وبالسرور سفر بريدو
يا شعورا ما ترفع
لا كسر خاطر مريدو
ليك فارد قلبي مشرع
شذبو وهذب عنيدو
غني في جنباتو ارتع
وانتقي النظم التريدو

جفـــــــــاك مخيــــــــــــــــــــــــــف محي الديـــــــــــــن ودالعقــــــــــــــــدة

علقم جفاك مخيف

وانا في انتظارك مت

حرقه وصداع ونزيف

عيني بحور والموج

وين الضفاف والقيف

قلمي انشده مشلول

ما بانلو تاني خريف

شردن حروف شعري

وانا في الكتابه حريف

كيف اكتبك اهات

وانتي بتتمي الكيف

يا شارده من عيني

لا لبقه لا كتيف

ما برضي ليك غياب

كيفن بعادك كيف

كيفن أكون مبسوط

ومنك جفاني الطيف

يا غارسه في احشاي

قلبا بياضو نضيف

بالفرحة بيك نشوان

ما طل دارو الحيف

فوقو الشموس شرن

وبقيتي ليهو صريف

ضاريتي من احزان

بسمع خطاها حفيف

شالك جواهو وداد

ما بعرف التزييف

واشواق مداها مداد

ما بكسرا التجفيف

محفوره في اعماق

ماهن قراب وطريف

لحظة غيابك جات

وما بسترا التقييف

ولو غبتي عن بستان

كيفن اشوفو وريف

يا صادقه في ازمان

 فاها وشرابا الزيف

لا تغيبي عن عيني

علقم جفاك مخيف 

الفــــــــــــرح المجانـــــــــــــــــــي محي الديــــــــــــــــن ودالعقــــــــــــــــــدة

قالتلي ونفسها متروسه

بمشاعر صامده ومدروسه

أشعارك حلوه ومنحوسه

زي بلعة ريقنا المضروسه

يا سيد الريده المدهوسه
ليشن بتبالغ في احزاني....

فكيت انفاسي المحبوسه
وطلقت العبره المدسوسه
قتليها حروفي الممغوسه
من ريده بتنخر زي سوسه
وتملي في عمقك مغروسه
وأحزان بتشكل أوزاني.....

يانفسي هواجسك محسوسه
من عين حسادك محروسه
والنفس الحاقدةالمفروسه
دي سعادتك موتا وكابوسا
من ريدك بغرف قادوسا
ومن صدقك تشقي وبتعاني.....

قالت من صدقك اتبرا
لو دايما منو بتنضرا
واسمح زي غيرك من برا
بالكذبه ربوعك تخضرا
من باكر قسما تنسرا
ده الحاصل وعندك عنواني.....

الحاصل طبعا يا حره
ما بقبل عيشة المجتره
لو روحك تطلع تنجره
وفي بخسه اوصالك تنصره
يا نفسي الشوم المغتره
لا تبقي الفكر الشيطاني.....

يا نفسي عقوقك شاويني
وفي بحر احزانك طاويني
لا تدسي سمومك مابيني
خليك اصيله وطاوعيني
الصدق وحاتك نور عيني
شن نفعو الفرح المجاني......

يا نفس العشق الاماره
في الدنيا مراحل دواره
يوم صافي ويوما عكاره
يوم تبخل ترفع اسعاره
يوم تكرم تندلى ثماره
ابقيلي قريني الحقاني.....

قالتلي صدقت ومعذوره
ياهن اقدارنا المسطوره
شن طعم النفس المحقوره
قلوبنا العاشقه المفطوره
حتلقى الريده المقدوره
في الحب اتجدد ايماني.....

مداخـــــــــــــــل سكتـــــــــك محي الديــــــن ودالعقــــــــدة

حاولت مره اسكتك

واعبر مداخل سكتك

والجم حروفي السكتك

لقيتني في الاخر براي

وكل المعابر حقتك

حاولت اكتب لك قصيد
ممزوجه بيك تحنان وريد
مفتونه بيك حتي الوريد
يا صحوه في نظمي وغناي
افراحي طارت ركتك

جاهدت بيك زمني العضير
انا يا جبار خاطري الكسير
ما شفت في الحيين نضير
يكسرني كم بحرق حشاي
زي ما بتكون نار فرقتك

اقريني من هنا  للغلاف
تلقيني جنبك اختلاف
اسقيني من فرحك سلاف
من دنك اتسطر رواي
افكاري يوم ما غبتك

مالو طيفك عني غاب
لا يكون هنا ظنو خاب
واتلافتو الفرقه العذاب
 بالوحشه اتجدد بكاي
دمعت سحابة وبلتك

في انتظار طيفك يزور
عجلات حياتي ابت تدور
زوريها يا بدر البدور
تكفيني بسماتك معاي
اشتقت شوقك وضحكتك

كتبت في الاخر سطور
مفضوحه باجمل شعور
يا غايبه في جواي حضور
خليك في الهمسات رجاي
واعبر مداخل سكتك